真正的我

自從阿仔出世之後，呢十幾日的生活真係十分充實，基本上係忙到報紙電視都無時間睇。

撞正公司 peak season，日日番去好似打仗咁已經十分疲乏。回到家中，食完飯，洗下碗，洗下衫，幫阿仔執下屎，又一日。

想話請幾日產假陪下陳太，又真係行唔開。無辦法，搵食艱難。唯有暫時辛苦陳太了。

老是覺得近來發生左不少事情，令我覺得有一點點迷惘。能力越大責任越大？我本身0既能力可能根本無咁大。又或者係 timing 的問題。

回想當初入行，都是誤打誤撞。如果只是誤入避風塘，五年後的今日，我這隻船是否應該要駛番出大海呢？

雖然每日番到公司都唔開心，不過只要想起阿仔同老婆係屋企等緊，又睇番電話 wallpaper 阿仔張相，咁先有動力撐落去。

中學畢業剛十年，夜闌人靜，反思過後，發現還是比較喜歡以前球場上的自己。因為那個充滿熱誠，百份百付出，而又享受比賽的我，才是真正的我。無論是足球還是排球，我投放的感情及努力比對讀書的付出還要多。最記得當時大伙兒經常練波，直到天黑連波都睇唔到先肯番屋企。

年紀越大負擔越多。夢想與理想就在不經不覺間被歲月所磨滅。

仲有年幾先到三字頭的我，會否有例外？