仲等咩呀?

今日係網上見到, 有人去見工, 職位是倉務員, 然後被問到: 請列出你的三個優點及三個缺點. 另外, 有沒有做過一件事是你覺得足以自豪的?

然後這位人兄大惑不解: 做倉務員都要答呢種問題?

其實不足為奇, 性格的確會影響工作表現及能力, 此乃 Aptitude Test. 呢位人兄實不宜大驚小怪.

做人耐左, 通常都會被生活迫得頭昏腦脹. 日日番工放工, 假日都只係同三五知己或一家大小食下飯, 行下街. 哪有時間反思自己的生命中值得自豪的事情?

"有沒有做過一件事是你覺得足以自豪的?" 這是一道很好的命題. 如果日後朗朗 B 問我, 我呢個做老豆0既又會點答?

我呆左一陣, 真係講唔出口. 自己做人二十幾年確係無做過一件對社會有很大貢獻, 而又足以自豪的事情. 連扶阿婆過馬路都未試過. 如果我是那位人兄, 我想, 我只能憑自己前半生的所作所為, 亂答一通, 胡扯過去.

我覺得好慚愧, 但仍然要以此作答. 總比交白卷好. 輸人都唔好輸陣.

- 我到過外國浸鹹水. 雖然都係得半筒水, 放假多過上堂. 但起碼有把握時間, 週遊列國, 到處吸取別國文化的精髓, 擴闊自己的視野.

- 我就讀中學時係活躍份子, 曾代表不同0既校隊征戰幾十場. 雖然最後一個獎都無, 但我起碼敢站出來代表學校呀. 須知道, 明知會大敗0既比賽都要繼續打, 係需要一份空前絕後0既勇氣. 係咪? 等如每年新年都有人去爭上頭注香, 我都好佩服佢地. 大佬, 能夠裝到頭注香0既人只有一個, 其他全部都係輸家喎.

- 不過, 雖然校際比賽獎項零雞蛋, 但校內社際比賽, 我幫社團攞過唔少隻盃喎.

- 我早結婚, 仔都生埋, 有安穩0既家庭同工作. 古語有云"修身齊家治國平天下", 我起碼做左頭兩樣, 後邊個兩樣, 似乎係社會尖子0既責任. 但我唔係尖子, 下一個目標只可以係"治公司". 像我這些半筒水的大學生, 豈能"治國平天下"?

- 我絕對唔係少年有成, 但起碼工作不久即承蒙各方眷顧, 有機會東奔西跑出外工幹, 見識一下如美國這些 bull shit 的地方. 真係與有榮焉.

- 最後, 日日鼻敏感的我, 依然義無反顧地與一頭長毛的牧羊狗同住. 咁都係值得自豪呀

我咁樣答, 老細 buy 唔 buy 係其次, 起碼這是對自己前半生的一個小總結.

我唔希望到三十歲0既時候, 連自己係點樣都唔記得左. 所以, 說到底, 呢篇文章其實係用來警告自己的 ----陳生, 你時日無多, 想做就去做啦, 仲等咩呀?